2. júní kl. 17:31 að staðartíma í Bergen, eftir langa og taugastrekkandi bið fyrir okkur sem vorum heima á klakanum, kom heilbrigður drengur í heiminn. 
Svona líka stór og stæðilegur, 5170gr og 55 cm.......takk fyrir takk  

Og hvað getur maður eiginlega sagt ? 

Hreinlega ekkert, horfir bara á myndirnar orðlaus og dáist að fegurð lífsins sem maður á einhvern óskiljanlegan hátt átti þátt í að skapa með því að fæða pabbann í heiminn fyrir rúmum 25 árum. 

Stolt er trúlega það sem lýsir því best og eru orsök þess að tárin trilla oft og iðulega niður kinnarnar þegar amman starir á myndirnar hér að ofan. 

Og af hverju að vera að mæta í vinnuna ?  Kemur hvort eð er eiginlega engu í verk, enda í fullri vinnu við að taka við kveðjum í gegnum síma, SMS og á fésinu

Eiga ömmur ekki annars bara að vera heima að prjóna í lazyboy ?     

Jæja, þá eru bara að verða komin 13 ár síðan sá yngri spýttist í heiminn.  Finnst nú ekki svo langt síðan við hringdum yfir í Eskihlíð 10 þar sem frumburðurinn var í afmælisveislu hjá Val vini sínum og sögðum honum að nú væri komið að fæðingu.  Hann þyrfti því miður að kveðja partýið og koma heim því við værum á leið upp á deild.  Hann var nefnilega búinn að ákveða að vera viðstaddur fæðingu barnsins sem hann var búinn að bíða svo eftir. 

Það var fljótlega eftir kvöldfréttirnar á RÚV sem við hringdum bjöllunni á Landsspítalanum og á móti okkur tók ljósmóðir.  Hún setti nú upp smá svip þegar hún sá unglinginn sem var með okkur í för.  En eftir smá útskýringar var okkur hleypt inn og undirbúningur hófst.  Frumburðurinn kláraði að horfa á spaugstofuna á meðan móðirin kepptist við hríðarnar en þegar kollurinn fór að kíkja var hann kallaður inn.  Ég var semsagt svo heppin að hafa tvo aðstoðarmenn mér við hlið, auk ljósmæðranna.  Eiginmaðurinn var svona í þessu týpíska styrktarhlutverki á meðan sonurinn sá um að halda köldum þvottapoka við ennið á mér og fór ófáar ferðirnar í vaskinn til að kæla pokann.  Ekki þáði ég nein verkjalyf eða hláturgas, heldur andaði krakkann bara í heiminn   Hann kom svo heilbrigður og fallegur í heiminn kl. 21:45  Og stóri bróðir klippti á naflastrenginn.  Yndisleg og ógleymanleg stund.  

Og hann er semsagt 13 ára í dag þessi gullmoli.  Frábær og heilbrigður strákur sem mér þykir að sjálfsögðu alveg óendanlega vænt um. 

Til hamingju með daginn elskan ! 

Fékk mér göngutúr í rigningunni eftir vinnu sem er svosem ekki í frásögur færandi.  En þar sá ég einn af vorboðunum og þá er ég ekki að tala um fuglana.  Gekk fram á þrjár sætar stúlkur í Mávahlíðinni í litríkum regnkápum sem voru í snú snú. 

Datt í hug að deila þessu með ykkur, kannski ég fari að henda inn færslum hér á nýjan leik.  Lofa samt engu.

Þó það sé nú langt um liðið síðan ég bloggaði þá eru það þó ekki 25 ár.  En það eru þó liðnir 3 mánuðir og mér finnst það bara ansi langur tími. 

En ennþá ótrúlegra er nú samt að trúa því að frumburðurinn sé orðinn 25 ára.  Hvað er það ????  Mér finnst alveg hreint óskiljanlegt að ég sé móðir manns sem er orðinn þetta gamall, ég sem er alltaf 29... eða þannig   

En ég er svo sannarlega stolt og þakklát fyrir að eiga þennan flotta strák sem hefur tekist að láta draumana sína rætast. 

Hann mun vakna á afmælisdaginn í Teheran og eyða síðan deginum á flugvöllum í góðum hópi þar sem áfangastaðurinn er Luxembourg.  Það er aldrei að vita nema stóri frændi splæsi á hann eins og einum köldum og pizzusneið  (ef Óli Jóh leyfir)   

En ég ætla hinsvegar í tilefni dagsins að sleppa því að mæta til vinnu og taka því rólega eins og gamlar konur eiga að gera

Verslunarmannahelgin gengin í garð og hér á heimilinu voru miklar vangaveltur um hvað skyldi gera um helgina.  Um tíma stóð til að fara í útilegu en svo varð úr að sofa heima en kíkja bara út fyrir bæinn í dagsferð.  Það var því ræs snemma í gærmorgun og nestið gert klárt.  Vorum mætt á Höskuldarvelli við Keili um ellefuleytið í þessu líka frábæra veðri.  Gangan á fjallið gekk vel þó það væri ansi laus jarðvegur á kafla efst í fjallinu.  Við vorum komin upp á rúmum klukkutíma og útsýnið æðislegt.  Og veðrið algjörlega frábært.
 

Drifum okkur svo í sundlaugina í Grindavík til að mýkja vöðvana og skola af okkur svitann.  Keyrðum svo Suðurstrandarveginn, kíktum inn í Krísuvíkurkirkju, borðuðum nesti og renndum svo alla leið í Miðdal við Laugarvatn.  Þar voru vinir okkar, Unnur, Ási og Andrea í útilegu.  Þar var grillað og góðrar samveru notið til miðnættis áður en við renndum heim í rúmið okkar góða.  Frábær dagur í alla staði.  Fleiri myndir í albúminu 

Þá er maður búinn að koma eldri drengnum frá sér.  Hann búinn að vera giftur í meira en viku og ekki búinn að kvarta neitt ennþá

Brúðkaupsdagurinn rann upp bjartur og fagur og leið eins og í draumi.  Athöfnin í kirkjunni alveg yndisleg og svo tók við þessi líka frábæra brúðkaupsveisla með góðum mat, hlátri og dansi fram á nótt.  Svona eiga brúðkaup að vera. 

Lífið hjá mér er aftur komið í fastar skorður, sem þýðir fótbolti, vinna og meiri fótbolti.  Litla dýrið er að keppa á ReyCup sem lánsmaður með Valur 2 í 4. flokki.  Fann þessa skemmtilegu mynd af Völsurunum á setningarhátíðinni inn á heimasíðu mótsins www.ReyCup.is 

Þeir gerðu sér lítið fyrir og komust upp úr riðlinum sínum og unnu svo Þrótt í krossspilinu í morgun 0-1.  Eru því komnir í úrslitaleikinn á ReyCup    Áfram Valur ! 

Blessuð sólin elskar allt, allt með kossi vekur....

Steggurinn er lentur og var líkt og gæsin tekinn höndum í Leifsstöð.  Og versta martröð drengsins varð að veruleika....  hann var klæddur í KR treyju

Hann tók síðan létta upphitun og reitabolta með mfl KR.  Hvað tók við eftir það er ekki á hreinu í augnablikinu en ég er nokkuð viss um að hann var þeirri stund fegnastur þegar hann fékk að yfirgefa Skítaskjólið eins og hann kallar það sjálfur.  En úr KR treyjunni fékk hann ekki að fara

Yndislegur dagur að kveldi kominn.
Fórum í 1 árs afmælisveislu hjá Árna Þór töffara í sólinni í dag. Frábær veisla að venju hjá þeim Lalla og Unni.  Maður fer sko aldrei svangur frá þeim. 

Fleiri myndir í albúminu

Þar sem sólin skein svo skært í morgun þá fékk Kewell meira segja að viðra sig og fara lengra en út á svalir.  Og að þessu sinni var ég ekkert að stressa mig yfir því að beisla hann.  Kallinn kíkti út í garð, nagaði smá gras og hitti Míu litlu nágrannakisu hér úti á bílastæði.  Gerði bara eins og hún og lagðist undir bíla í skuggann   Fljótur að læra.  En hann vildi samt ekki vera of lengi, kom bara sjálfur aftur inn eftir tæpan klukkutíma.  Það væri þá aldrei að kallinn færi að fara oftar út. 

Nú fer að líða að því að steggurinn komi til landsins.  Allt að gerast

Hún lenti í dag og var samstundis tekin höndum í Leifsstöð

Ég er alsæl verðandi tengdamóðir.  Þessi stúlka er einstakt eintak.   

En djö... er maður annars að verða gamall eitthvað !!!    
Frumburðurinn brátt giftur maður, ómæ... ómæ

Sumarið komið og minns er í Vatnaskógi þessa viku.
Honum leiðist auðsjáanlega ekki. 

Mér leiðist ekki heldur.

Mikið óskaplega er nú lífið yndislegt á Íslandi þegar sólin skín og hitastigið hækkar.  Vonandi að við fáum fleiri svona daga eins og í dag.  Væri ekki slæmt fyrir þessa kreppuþjáðu þjóð að fá smá sól og sumar þegar það virðist vera sem 90% landsmanna ætli að eyða sumarfríinu sínu innanlands. 

Pabbi átti afmæli í dag og varð 80 ára.  Geri aðrir betur.  Við fjölskyldan borðuðum saman dagverð á veitingastaðnum Vox til að fagna áfanganum.  Getum sko mælt með því.  

En áður en mætt var í afmælið þá horfðum við á 5. flokk Vals spila sinn síðasta leik í Reykjavíkurmótinu í fótbolta.  Þeir voru fyrir leikinn búnir að tryggja sér titilinn en létu það ekki trufla sig og unnu Fylki 4-2 í blíðunni á Hlíðarenda.  Okkur er sagt að það séu einhver rúmlega 30 ár síðan Valur vann síðast þennan titil í 5. flokki. 

Til hamingju strákar !  

 
En við létum þetta ekki nægja.  Við fengum okkur göngutúr seinnipartinn út í Nauthólsvík þar sem borgarbúar sleiktu sólina sem aldrei fyrr.  Þar var mannlífið svo skemmtilegt.

Við enduðum svo kvöldið á KR vellinum þar sem Sindri Snær stóð vaktina í marki Þróttar og hélt hreinu   Frábær leikur hjá honum.  Mér leiðist sko ekki að mæta í Frostaskjólið og sjá KRinga tapa stigum.

En á morgun er nýr fótboltadagur.  Þá mætum við Valsmenn Keflvíkinginum suður með sjó.  Við krossum fingur og vonumst eftir 3 stigum þar. 

Skelltum okkur í Laugardalslaugina eftir kvöldmatinn.  Alltaf svo notalegt að kíkja í heitu pottana og mýkja vöðvana.  Og mannlífið í laugunum er svo yndislegt.  En það er svolítið meira spes í Laugardalnum.    Þar eru til dæmis fleiri útlendingar en á hinum sundstöðunum.  Sennilega hefur hann ekki verið íslenskur maðurinn sem spókaði sig á níðþröngri gamaldags sundskýlunni í kvöld.  Ekki margir íslenskir karlmenn sem láta sjá sig í slíkri flík lengur.  Svei mér þá ef hún var ekki bara í stærð XS 

En svo var hann klárlega íslenskur þessi sem skellti sér inn í gufuna og flaggaði þessu líka stóra tattoo á loðnum brjóstkassanum, sjálfu skjaldarmerki Íslands - í lit og alles     Já, sæll !   

Í steinapottinum sat fólk í mestum makindum og flestir spjölluðu lágstemmt saman eins og gengur.  Nema tveir ungir íslendingar !  Þeir ræddu pólítík og önnur mál svo hátt og snjallt að halda mætti að þeir væru að æfa sig í ræðumennsku.  Við færðum okkur yfir í heitari pottana, hinum megin í lauginni og nutum kyrrðarinnar

Mannlífið er svo sannarlega skemmtilegt og litríkt á vorkvöldunum í henni Reykjavík. 

Bloggletin hefur verið algjör hér á þessum bæ undanfarið en nú er sko tilefni til að setja inn færslu.  Litla barnið tók þátt í Íslandsmótinu í handbolta hjá 6. flokki sem haldið var í Vestmannaeyjum um helgina.  Það gekk nú ekki þrautarlaust að komast til Eyja í gærmorgun þannig að þeir mættu alveg á síðustu mínútunni í fyrsta leik gegn sterkasta liðinu í riðlinum   Þeir byrjuðu því á því að tapa fyrsta leiknum og gerðu svo jafntefli við Víking í næsta leik.  Ekki byrjaði mótið nú vel en svo vöknuðu þeir svona líka ferskir í morgun og unnu alla leikina sína, KR, Gróttu og FH.  Og uppskáru silfur á mótinu.  Frábær árangur hjá þeim, því þeir byrjuðu Íslandsmótið í haust í 2. deildinni. 

Við eyddum páskunum í Bergen hjá frumburðinum og kíktum á einn leik sem tapaðist reyndar.  En brunaliðið er nú á siglingu eftir tvo sigurleiki í röð.  Vonandi að þeir haldi áfram að hala inn stigunum.  Við fengum yndislegt veður og svo var haldið upp á 8 ára afmæli Hjartar Smára með stæl.  Hér er að finna nokkrar myndir frá ferðinni. 

Annars er undirbúningur fyrir vortónleika Valskórsins í fullum gangi og hafa miklar æfingar staðið yfir undanfarna daga.  Generalprufan er svo á morgun og tónleikarnir á mánudagskvöld kl. 20 í Háteigskirkju.  Hinn ástsæli Raggi Bjarna mun taka nokkur lög með kórnum.  Mikið gaman og mikið fjör.  

Handboltavertíðinni er rétt ólokið hjá Val og svo fer að styttast í fyrsta leik í Íslandsmótinu í fótbolta.  Alltaf nóg að gera í boltanum hér á bæ og það þykir okkur sko ekki leiðinlegt.  Áfram Valur ! 

Skelltum okkur til Boston um helgina.  Höfðum hvorugt komið þangað áður og urðum ekki fyrir vonbrigðum með borgina.  Mikið af flottum byggingum og mannlífið skemmtilegt. 

Fengum okkur "humongous" steik á  Smith & Wollensky og túnfisk sem bráðnaði á tungunni ásamt ýmsu öðru góðgæti á Bricco, frábærum stað á Hanover Street.  Fengum líka góðar samlokur á  Finale þar sem líka er hægt að fá gott Illy kaffi.  Það eru semsagt ekki bara Starbucks staðir í Boston, þó þeir séu alveg óóóótrúlega margir  

p.s. Fleiri myndir í myndasafninu. 

Já hann Kewell okkar er svo sannarlega kynlegur kvistur.  Eða kannski er hann svona meðvirkur með stjúpu sinni að hann greindist bara líka með sykursýki.   Já ég segi það og skrifa....kötturinn er kominn með sykursýki og fær insúlínskammtinn sinn daglega.  Stjúpan er væntanleg í heimsókn um helgina og það verður nú fróðlegt að sjá hana mæla fyrst í sér blóðsykurinn og taka svo stöðuna á kettinum í framhaldinu. 

Kvefið er á undanhaldi eins og fróður Bolvíkingur var búinn að spá að það gerði á þriðju viku.  Ekki að spyrja að þessu vestfirðingum.  Og þar sem ég var nú að verða svo hress skellti ég mér í hlaupafötin á sunnudaginn og ákvað að fara hringinn minn.  En Adam var nú ekki lengi í paradís.  Var ekki búin að hlaupa lengi þegar ég byrjaði að stífna svona líka upp í hnakkanum og gafst hreinlega upp eftir 15 mínútna hlaup.  Skellti mér beint í heita pottinn í Vesturbæjarlauginni og er smám saman að skána.  En það ætlar ekki að vera einleikið með mig og útihlaupin.  En ég skal, get og vil